नागपूरच्या शाळेत अमानुषतेचा कळस ; 13 वर्षीय विद्यार्थिनीला शिक्षिका – मुख्याध्यापकांकडून बेदम मारहाण
नागपूर : शहरातून समोर आलेल्या एका धक्कादायक घटनेत सातवीत शिकणाऱ्या १३ वर्षीय अल्पवयीन विद्यार्थिनीला किरकोळ कारणावरून शिक्षिका आणि शाळेच्या मुख्याध्यापकांनी बेदम मारहाण केल्याची घटना घडली आहे. या घटनेमुळे संपूर्ण शिक्षण व्यवस्थेवर प्रश्नचिन्ह उपस्थित झाले आहे.
मिळालेल्या माहितीनुसार, संघर्ष नगर, पिवळी नदी परिसरात राहणारी ही विद्यार्थिनी २२ जानेवारी रोजी शाळेत हिंदीच्या तासाला उपस्थित होती. या दरम्यान तिने आपल्या मैत्रिणीकडून आरसा घेऊन दुसऱ्या विद्यार्थिनीला दिला. हा अगदी किरकोळ प्रकार असताना शिक्षिकेला याचा राग आला. कोणतीही चौकशी किंवा समज न देता त्यांनी विद्यार्थिनीला तब्बल पाच ते सहा जोरदार थापड मारल्या आणि वर्गाबाहेर काढले, या प्रकारानेही समाधान न झाल्याने पुढे आणखी धक्कादायक घटना घडली. शाळेच्या मुख्याध्यापिकेने सदर विद्यार्थिनीला कार्यालयात बोलावून स्टीलच्या स्केलने तिच्या हात-पायांवर बेदम मारहाण करण्यात आली. या मारहाणीत विद्यार्थिनीला गंभीर दुखापती झाल्या असून ती मानसिक धक्क्यात गेली आहे.
पीडितेच्या वडिलांनी सुरुवातीला शाळा प्रशासनाकडे तक्रार दाखल केली. मात्र कोणतीही ठोस कारवाई न करता प्रकरण दडपण्याचा प्रयत्न करण्यात आल्याचा आरोप केला. अखेर त्यांनी १०९८ चाइल्ड हेल्पलाईनवर तक्रार नोंदवली. चाइल्ड हेल्पलाईनच्या पथकाने तात्काळ दखल घेत विद्यार्थिनीचा जबाब नोंदवला व समुपदेशन केले. पीडित विद्यार्थिनीची वैद्यकीय तपासणी नागपूरच्या मेयो रुग्णालयात करण्यात आली. तपासणीत मारहाणीच्या जखमा स्पष्ट झाल्या. त्यानंतर पोलिसांनी संबंधित शाळेचे सीसीटीव्ही फुटेजही जप्त केले आहे. या प्रकरणी यशोधरा नगर पोलीस ठाण्यात बाल न्याय (बालकांची काळजी व संरक्षण) अधिनियम २०१५ मधील कलम ७५, भारतीय न्याय संहितेतील विविध कलमे तसेच आरटीई कायदा २००९ मधील कलम १७ अंतर्गत गुन्हा दाखल करण्यात आला आहे.
