बायकोने व्हॉट्सअ‍ॅप डेटा गोळा करत केल्या नवऱ्याच्या भानगडी उघड
नागपूर: एका महिलेने आपल्या पतीचे कारनामे उघडे पाडत अनेक महिलांची त्याच्या तावडीतून सुटका केली. आरोपी अविवाहित असल्याचे भासवून महिलांशी मैत्री करुन त्यांच्याशी शारीरिक संबंध ठेवत असे आणि त्या संबंधांचे चित्रीकरण करुन त्याआधारे महिलांना ब्लॅकमेल करित असे. याचा सुगावा आरोपीच्या पत्नीला लागताच तीने त्याचा व्हॉट्सअ‍ॅप वर मिळालेला सर्व डेटा पोलिसांना दिला. आणि पीडित महिलांची त्याच्या जाळ्यातून सुटका केली.
अटक करण्यात आलेल्या आरोपीचे नाव अब्दुल शारिक कुरेशी उर्फ साहिल (वय ३३) असे आहे. पोलिसांनी दिलेल्या माहितीनुसार, आरोपी आपण अविवाहीत असल्याचे भासवून अल्पवयीन मुली आणि महिलांना फसवत असे. आरोपी टेका नाका येथे पानाचे दुकान चालवतो. एके दिवशी पत्नीने चुकून आरोपीचे व्हॉट्सअ‍ॅप अकाउंट उघडले. त्यातील इतर मुलींसोबतचे त्याचे चॅट, आक्षेपार्ह फोटो आणि व्हिडिओ पाहून तीला धक्का बसला. आरोपी केवळ महिलांनाच ब्लॅकमेल करत नव्हता तर एका अल्पवयीन मुलीलाही त्रास देत होता, हेही त्यातून उघड झाले. त्यामुळे तीने आरोपीचा व्हॉट्सअ‍ॅप वरील सर्व डेटा पुरावा म्हणून स्वतःच्या मोबाईलमध्ये घेतला व तो पोलिसांना दिला.
आरोपीने एका अल्पवयीन मुलीला आपल्या जाळ्यात ओढले होते. इतकेच नाही तर मुलीच्या आईने तिला भेट दिलेली सोन्याची अंगठी ३०,००० रुपयांना विकण्यास भागही पाडले. ही बाब उघडकीस आल्यानंतर पोलिसांनी मुलीच्या तक्रारीवरून नवीन गुन्हा दाखल केला आणि आरोपीला अटक केली. पोलिसांच्या म्हणण्यानुसार, इतर महिलांनाही तक्रार दाखल करण्यास सांगण्यात आले होते, परंतु सामाजाच्या भितीमुळे इतर महिलांनी तक्रार दाखल केली नाही. सध्या पोलिस या प्रकरणाचा अधिक तपास करत आहेत.
