कारखान्यातील भीषण स्फोटाने परिसर हादरला ; एकाचा जागीच मृत्यू , तर चार जण गंभीर जखमी
नागपूर : जिल्ह्यातील बाजारगाव येथे गुरुवारी पुन्हा एकदा कारखान्यात मोठा स्फोट झाल्याची घटना घडली आहे. सोलर एक्सप्लोसिव्ह लिमिटेडच्या T-15 प्लांटमध्ये घडलेल्या या दुर्घटनेत एका कर्मचाऱ्याचा मृत्यू झाला असून चार जण गंभीर जखमी आहेत. जखमींवर सध्या आयसीयूमध्ये उपचार सुरू आहेत. सदर दुर्घटनेत आणखी नऊ जणांना किरकोळ दुखापती झाल्या आहेत. मध्यरात्री झालेल्या या स्फोटाचा आवाज एवढा मोठा होता की, स्फोटानंतर महामार्गावर मलबा उडाला.
स्फोटाचा आवाज एवढा प्रचंड होता की त्याचे हादरे बाजारगावसह शिवा, सावंगा आणि आसपासच्या दहा गावांत जाणवले. घाबरलेल्या नागरिकांनी मध्यरात्री घराबाहेर धाव घेतली. स्फोटानंतर कारखान्यातील लाखो रुपयांची यंत्रसामग्री व साहित्य जळून खाक झाले. नागपूर-अमरावती महामार्गालगत असलेल्या या युनिटमध्ये ग्रेनेड, ड्रोन्स आणि विविध स्फोटके तयार केली जातात. त्यातीलच PP-15 प्लांटमध्ये रात्री 12:34 वाजता ही दुर्घटना घडली. सोलर एक्सप्लोसिव्हमध्ये मध्यरात्री झालेल्या अपघातात आरएनडी लॅबमधील मयूर गणवीर नावाच्या कामगाराचा मृत्यू झाला. कारखान्यात HMX, TNT आणि RDX सारखी स्फोटके तयार केली जातात. काम सुरू असताना धूर निघत असल्याचे दिसल्यावर बहुतेकांना बाहेर काढण्यात आले आणि त्यामुळे आणखी मोठी दुर्घटना टळली.
घटनास्थळी मलब्याचे ढीग आणि दूरवर फेकलेले साहित्य पाहून स्फोट किती भीषण होता याची कल्पना येते. गेल्या काही वर्षांत विदर्भात वारंवार अशा स्फोटाच्या घटना घडत आहेत. डिसेंबर 2023 मध्ये याच कंपनीत झालेल्या स्फोटात नऊ कामगारांना प्राण गमवावे लागले होते. सातत्याने होणाऱ्या या घटनांमुळे प्रशासन आणि कंपन्यांच्या सुरक्षा यंत्रणांवर प्रश्नचिन्ह उपस्थित झाले आहे.
