मद्यधुंद अवस्थेत कार चालवीत जवानाने अनेकांचा जीव घातला धोक्यात ; संतप्त नागरिकांनी केले पोलिसांच्या हवाली
नागपूर : रामटेक तालुक्यात एका लष्करी जवानाने दारूच्या नशेत निष्काळजीपणे कार चालवत नागरिकांच्या जीवाला धोक्यात टाकले आहे. सायंकाळी साडेआठच्या सुमारास नगरधन गावात ही थरारक घटना घडली. ग्रामस्थांच्या तत्परतेमुळे मोठा अनर्थ टळला आहे. संतप्त नागरिकांनी जवानाला चोप देत पोलिसांच्या हवाली केले.
सदर जवानाचे नाव हर्षपाल महादेव वाघमारे (वय अंदाजे ४०) असून तो हमलापुरी (ता. रामटेक) येथील रहिवासी आहे. हर्षपाल भारतीय लष्करात आसाम येथे कार्यरत असून सुट्टीवर आपल्या गावी आला होता. रविवारी सायंकाळी त्याने दारूच्या नशेत MH 40 CA 6377 क्रमांकाची कार नगरधन गावातून चालवली. नशेत असल्याने त्याचे कारवरील नियंत्रण सुटले व रस्त्यावरील नागरिकांना एकामागोमाग एक कट मारायला सुरुवात केली. वाघमारे याने इतक्या बेफिकिरीने गाडी चालवली की परिसरात अक्षरशः दहशतीचे वातावरण निर्माण झाले. अनेक महिला, मुले आणि वृद्ध थोडक्यात बचावले. सुदैवाने कोणालाही गंभीर दुखापत झाली नाही. या प्रकारानंतर गावकऱ्यांनी त्याचा पाठलाग करून हमलापुरी रोडवरील हनुमान मंदिराजवळ त्याला गाठले. दरम्यान, त्याची कार झाडाला धडकली आणि नाल्यात कोसळली. गावकऱ्यांनी त्याला गाडीतून ओढून बाहेर काढले आणि संताप व्यक्त करत चांगलाच चोप दिला.
घटनेची माहिती मिळताच रामटेक पोलीस ठाण्याचे अधिकारी तातडीने घटनास्थळी दाखल झाले. त्यांनी ग्रामस्थांच्या तावडीतून वाघमारे याची सुटका करत त्याला ताब्यात घेतले. नंतर त्याला प्राथमिक उपचारासाठी रामटेक येथील उपजिल्हा रुग्णालयात दाखल करण्यात आले. निष्काळजी व बेदरकारपणे वाहन चालवण्याचा गुन्हा नोंदवला आहे.
