आजारपणाने त्रस्त वृद्ध होमिओपॅथिक डॉक्टरने पत्नीसमवेत केले विष प्राशन ; डॉक्टरांचा मृत्यू , पत्नी गंभीर
नागपूर : शहरातील सोनेगाव पोलीस ठाण्याच्या हद्दीत येणाऱ्या समर्थ नगरी परिसरात बुधवारी एक अत्यंत हृदयद्रावक घटना घडली आहे. एका ८० वर्षीय निवृत्त होमिओपॅथिक डॉक्टरने आपल्या ७० वर्षीय पत्नीसमवेत दीर्घ आजाराला कंटाळून विष प्राशन केल्याची घटना समोर आली आहे. यात डॉक्टरांचा मृत्यू झाला असून, त्यांची पत्नी सध्या गंभीर आहे, त्यांच्यावर खाजगी रुग्णालयात उपचार सुरु आहेत. या दुर्दैवी घटनेमुळे परिसरात हळहळ व्यक्त होत आहे.
हि घटना समर्थ नगरी येथील प्लॉट क्रमांक १०४ मध्ये घडली आहे. मृत डॉक्टरांचे नाव गंगाधर बालाजी हरणे (वय ८०) असे आहे, ते दीर्घकाळापासून होमिओपॅथी व्यवसायात कार्यरत होते. त्यांची पत्नी निर्मला हरणे (वय ७०) या देखील आजाराने त्रस्त होत्या. सततचा शारीरिक त्रास आणि वाढत्या वयामुळे त्यांच्यावर मानसिक ताण आला होता. अखेर या त्रासाला कंटाळून त्यांनी पत्नीसमवेत बुधवारी सकाळी विष घेऊन आत्महत्या करण्याचा प्रयत्न केला. घटनेच्या वेळेस हे दाम्पत्य घरी एकटेच होते. त्यांची मुलगी एका खासगी शाळेत शिक्षिका असून, लग्न झाल्यानंतर वेगळे राहत होती. तर मुलगा झारखंडमधील एका स्टील प्लांटमध्ये कार्यरत आहे. त्यामुळे हरणे दाम्पत्य एकटेच समर्थ नगरीतील घरात राहत होते. शेजाऱ्यांनी दोघांनाही घराच्या पॅसेजमध्ये बेशुद्धावस्थेत पहिले. त्यांनी तत्काळ त्यांच्या मुलीला आणि पोलिसांना याची माहिती दिली. मुलगी तातडीने घरी पोहोचली आणि तिने दोघांनाही अंबाझरी परिसरातील एका खासगी रुग्णालयात दाखल केले.
डॉक्टरांनी तपासणीदरम्यान गंगाधर हरणे यांना मृत घोषित केले, तर निर्मला हरणे यांची प्रकृती चिंताजनक असल्याने त्यांच्यावर उपचार सुरू आहेत. पोलिसांनी घटनास्थळी धाव घेतली असता त्यांना विषाची बाटली आणि एक सुसाईड नोट आढळून आली. या चिठ्ठीत त्यांनी त्यांच्या निर्णयासाठी कोणालाही जबाबदार धरू नये, असे स्पष्टपणे नमूद केले आहे. त्यामुळे ही आत्महत्या असल्याची प्राथमिक शक्यता पोलिसांनी व्यक्त केली आहे. सध्या सोनेगाव पोलीस अधिक तपास करत आहेत.
