मोबाईलचा स्फोट होवून एकाचा दुर्दैवी मृत्यू तर  एक जखमी

मोबाईलचा स्फोट होवून एकाचा दुर्दैवी मृत्यू तर  एक जखमी

सिरेगावटोला येथील घटना

अर्जुनी मोरगाव :-  पोलीस स्टेशन अंतर्गत येणार्‍या तालुक्यातील नवेगाव बांध सांनगडी मार्गावरील   असलेल्या सिरेगाव/बांध गावापासून पाचशे मीटर अंतरावर  बजाज कंपनीची पल्सर गाडी क्रमांक एमएच ३६ एएफ ८२३७ या मोटारसायकलवर जातांना खिशात (पॉकीट) मध्ये मोबाईल फोनचा स्फोट होऊन एकाचा दुर्देवी मृत्यु तर एक जण जखमी झाल्याची घटना ६ डिसेंबर २०२४ रोजी  सायंकाळी ७:०० वाजताच्या दरम्यान घडली. सुरेश भिकाजी संग्रामे  (५४)  असे  मृतकाचे नाव आहे तर गाडीवरुन पडुन नत्थु गायकवाड हे गंभीर जखमी झाले आहेत.

सविस्तर असे की, साकोली तालुक्यातील  सिरेगाव/टोला  येथील  सुरेश संग्रामे हे आपल्या भाऊजी नत्थु गायकवाड यांचे सोबत नातेवाईकांकडे जेवन करायला मोटारसायकलने घरुन निघाले. काही अंतरावरतीच नवेगाव बांध-सानगडी मार्गावरील गोंदिया जिल्ह्याच्या अर्जुनी/मोरगाव पोलीस स्टेशनच्या हद्दीतील केसलवाडा फाट्यावर सुरेश संग्रामे यांच्या वरच्या खिशात असलेल्या मोबाईल फोनचा  स्फोट झाल्याने कपड्याला आग लागली. त्या आगीत त्यांचा शरीर भाजला त्यांना उपचारा करिता हलविले असता वाटेतच मृत्यु झाला. सोबत मागे बसलेले नत्थु गायकवाड हे गाडीवरुन पडल्याने ते गंभीर जखमी झाले. त्यांना भंडारा येथील लक्ष हॉस्पिटल मध्ये उपचाराकरिता दाखल करण्यात आले. मृतक सुरेश भिकाजी संग्रामे हे गडचिरोली जिल्हा परिषदेच्या देसाईगंज/वडसा पंचायत समिति अंतर्गत येणार्‍या जिल्हा परिषद उच्च प्राथमिक शाळा कसारी येथे मुख्याध्यापक पदावर कार्यरत होते. त्यांचा मोबाईल फोनच्या स्फोटात दुर्दैवी मृत्यु झाल्याने गावात हळहळ व्यक्त होत आहे.  अपघातातील मोटारसायकल अर्जुनी/मोरगाव पोलीसांनी पोलीस स्टेशनला जमा केली. घटनेचा अधिक तपास अर्जुनी/मोरगाव पोलीस निरीक्षक कमलेश सोनटक्के करीत आहेत.