तुम्हीही फोटो ‘घिबली’ करताय ? सावध ; नाहीतर अडकाल सायबर गुन्हेगारांच्या जाळ्यात
नागपूर : सध्या ‘घिबली’ फोटो ट्रेंड’ सुरू असून अनेकांची छायाचित्र तयार करण्यासाठी चढाओढ सुरू आहे. मात्र, हाच ‘ट्रेंड’ सायबर गुन्हेगारांसाठी संधी ठरत असून अनेकांना जाळ्यात ओढून फसवणूक करीत आहेत. ‘मेक अ घीबली फोटो.’ अशा आशयाची ‘लिंक’ पाठवून बँक खाते रिकामे करीत असल्याच्या घटना समोर येत आहेत.
गेल्या काही दिवसांपासून ‘चॅटजीपीटी’ने’ घीबली फोटो ट्रेंड’ आणला आहे. त्यामुळे प्रत्येक जण आपले जुने छायाचित्र ‘घीबली स्टाईल’ करून समाजमाध्यमांवर टाकत आहे. त्यामुळे ‘घीबली’ छायाचित्र औत्सुक्याचा विषय ठरत आहे. मात्र, या ‘ट्रेंड’चा गैरफायदा सायबर गुन्हेगार उचलत आहे. सायबर गुन्हेगार फेसबुक, यू-ट्युब, व्हॉट्सॲप, इंस्टाग्रामवर बनावट ‘लिंक’ टाकतात. ‘असा बनवा घीबली फोटो’ असे लिहितात. त्यामुळे अनेक जण नव्या ‘ट्रेंड’ मध्ये सामील होण्यासाठी समाजमाध्यमांवर आलेल्या ‘लिंकवर क्लिक’ करतात. ‘लिंक’वर ‘क्लिक’ करताच ते सायबर गुन्हेगारांच्या जाळ्यात अडकतात. लिंक’ मध्ये बँकेला जुळलेला भ्रमणध्वनी क्रमांक आणि बँक खात्याची माहिती विचारण्यात येते. अनेक जण ही माहिती भरतात. सायबर गुन्हेगार काही वेळातच बँक खात्यातून रक्कम काढतात.
सायबर गुन्हेगार ‘लिंक’ पाठवल्यानंतर ‘छायाचित्र अपलोड करा आणि ‘घीबली फोटो’ मिळवा,’ असे आमिष दाखवतात. त्यामुळे अनेक जण त्यांचे छायाचित्र अपलोड करतात. मात्र, आपल्या खासगी छायाचित्रांचा गैरवापर होण्याची शक्यता आहे. विशेषतः मुलींसाठी हा प्रकार धोकादायक आहे. मुलींच्या छायाचित्रांशी छेडछाड होऊ शकते किंवा मुलींच्या छायाचित्रांचा गैरवापरही होऊ शकतो. समाजमाध्यमांवर आलेल्या कोणत्याही ‘लिंक’वर ‘क्लिक’ करून ‘फोटो अपलोड’ करू नका. त्यामुळे सायबर गुन्हेगारांच्या जाळ्यात अडकण्याची शक्यता आहे.
