नागपुरातील पेट्रोल पंपांवर ऑनलाइन पेमेंट पुन्हा सुरु ; वाहनचालकांना मोठा दिलासा
नागपूर : जिल्ह्यातील पेट्रोल पंपांवर आज 10 मेपासून ऑनलाइन पेमेंट व्यवहारांवर लावलेल्या बंदीचा निर्णय मागे घेण्यात आल्याने हजारो वाहनचालक आणि ग्राहकांना यामुळे मोठा दिलासा मिळाला आहे. विदर्भ पेट्रोलियम डीलर्स असोसिएशनने काही दिवसांपूर्वी सायबर फसवणुकीच्या घटनांचा हवाला देत पेट्रोल पंपांवर कोणतेही डिजिटल व्यवहार स्वीकारले जाणार नाहीत, असा निर्णय घेतला होता. मात्र प्रशासनाच्या सूचनेनंतर आणि ग्राहकांच्या अडचणी लक्षात घेता हा निर्णय आता मागे घेण्यात आला आहे.
विदर्भ पेट्रोलियम डीलर्स असोसिएशननुसार, फोन पे, गुगल पे, पेटीएम, तसेच डेबिट आणि क्रेडिट कार्डद्वारे होणाऱ्या व्यवहारांमुळे अनेक पेट्रोल पंपचालकांना बँक खात्यांमध्ये तांत्रिक अडचणी आणि फसवणुकीला सामोरे जावे लागत होते. काही प्रकरणांमध्ये लाखो रुपयांची रक्कम बँकांनी गोठवली होती आणि काही खात्यांच्या व्यवहारांवर पूर्ण बंदी घालण्यात आली होती. ही रक्कम परत मिळवण्यासाठी गृहमंत्रालयाची परवानगी आवश्यक असल्याने पंपचालकांची मोठी गैरसोय झाली होती. दरम्यान, देशातील आर्थिक सुरक्षेच्या पार्श्वभूमीवर केंद्र व राज्य प्रशासनाकडून सर्व व्यवहार सुरळीत सुरू ठेवण्यासाठी सूचना देण्यात आल्या आहेत.
त्यानुसार, डीलर्स असोसिएशनने सामाजिक जबाबदारी जपत आणि ग्राहकांच्या सोयीसाठी ऑनलाइन पेमेंट पुन्हा सुरू करण्याचा निर्णय घेतला आहे. नागपूर जिल्ह्यातील ग्राहक आता पूर्वीप्रमाणेच आपल्या पसंतीच्या अ‍ॅप्सद्वारे सहज आणि सुरक्षितपणे पेट्रोल पंपांवर पेमेंट करू शकतील. यामुळे रोख व्यवहारांची अडचण दूर होऊन, डिजिटल व्यवहारांद्वारे सुलभ सेवा मिळण्याचा मार्ग मोकळा झाला आहे.
