वाघाच्या हल्ल्यात गाईसह दोन जनावरांची शिकार ; वाघामुळे परिसरात दहशत
नागपूर:- कामठी व कुही तालुक्याच्या हद्दीवर असलेल्या मौजा-वरंभा येथे वाघाने गावानजीक असलेल्या शेतात बांधलेल्या गाईसह दोन जनावरांवर हल्ला चढवत गाई सह दोन जनावरांची शिकार केल्याची घटना बुधवारी सकाळी उघडकीस आली.
श्रावण मोहूरले रा.वरंभा यांचे गावानजीक शेत असून त्यांनी मंगळवारी गाई सह इतर 2 जनावरे शेतात बांधली होती.रात्रीच्या सुमारास वाघाने हल्ला चढवून गाई सह दोन जनावरांची शिकार केली असून बुधवारी सकाळी दिसून आले. यात 3 जनावरांची वाघाने शिकार केली. शेतकरी मोहूरले यांचे मोठे आर्थिक नुकसान झाले असून तात्काळ नुकसानभरपाई देण्याची मागणी त्यांनी केली आहे.
कुही तालुक्यातील खोबना, खरबी, बोडकीपेठ सह अंबाडी, भोवरदेव आदी वरंभा लगत गावांत वर्षभरापूर्वी वाघाने अनेक जनावरांची शिकार केल्याचे दिसून आले. मात्र गेल्या 6 महिन्यापेक्षा जास्त कालावधीपासून वाघाच्या चर्चांना पूर्णविराम आला असताना गेल्या आठवड्याभरापासून कुही तालुक्यातील सावरखंडा नजीक वाघाचे काहींनी दर्शन केल्याच्या चर्चांना उधाण आले. त्यातच तालुक्याच्या सीमेवर असलेल्या वरंभा येथे वाघाने गाईची शिकार केल्याची माहिती मिळताच शेतकऱ्यांसह स्थानिक नागरिकांत भीतीचे वातावरण निर्माण झाले आहे.
