बाळ दूध पित नाही, आई निराशेत, मग जे घडलं त्याने साऱ्यांच्या डोळ्यात पाणी; सव्वा महिन्यांचं बाळ मायेला मुकलं
नागपूर: सव्वा महिन्यांची चिमुकली आईचे दुध पित नव्हती. यामुळे चिमुरड्या मुलीची प्रकृती खालावू लागली होती. मुलगी अशक्त होऊ लागली होती. हे पाहून तिची आई प्रचंड नैराश्यात गेली. याच नैराश्यातून या माऊलीने स्वत:चं आयुष्य संपविण्याचा निर्णय घेतला. सव्वा महिन्याच्या चिमुरडीच्या या आईने विष प्राशन करून आपलं आयुष्य संपवल्याची हृदयद्रावक घटना नागपुरात घडली. शहरातील हुडकेश्वर पोलिस ठाण्याच्या हद्दीतील सर्वश्रीनगर परिसरात ही घटना उघसकीस आली आहे.
नेमकं काय घडलं?
ही घटना गुरुवारी दुपारी अडीचच्या सुमारास समोर आली आहे. भाग्यश्री राजेश वानखेडे (वय २४, रा. सर्वश्रीनगर) असं या मृत महिलेचे नाव आहे. पोलिसांनी दिलेल्या माहितीनुसार, भाग्यश्रीचे पती राजेश हे कुशनचे काम करतात. चार वर्षांपूर्वी या दोघांचे लग्न झाले. भाग्यश्री, राजेश आणि राजेश यांचे वडील हे सर्वश्रीनगर येथे एका भाड्याच्या घरात राहत होते.
अलीकडेच भाग्यश्री व राजेश यांना मुलगी झाली. त्यामुळे घरात आनंदाचे वातावरण होते. मात्र, अचानक सव्वा महिन्यानंतर बाळाने दुध पिणे बंद केले. यामुळे भाग्यश्रीची चिंता वाढली. सव्वा महिन्यांच्या चिमुकली, तिला आईच्या दुधाशिवाय पर्याय नाही, या विचाराने ती दुखावली. दुधाविना मुलीची तब्येतही खालावू लागली होती. आपल्या मुलीची अशी अवस्था पाहून ती माऊली अस्वस्थ होऊ लागली. काय करावे हे तिला सुचेनासे झाले होते. त्यामुळे ती तणावात राहू लागली.
तिला थोडा बदल व्हावा यासाठी राजेशने भाग्यश्रीला लाखांदूर येथील तिच्या मोठ्या बहिणीकडे पाठविले. मात्र, त्याचाही फारसा फायदा झाला नाही. भाग्यश्रीचे मनोबल ढासाळतच होते. त्यामुळे ती काहीच दिवस बहिणीकडे राहीली आणि ११ फेब्रुवारीला घरी परतली. त्यानंतरही ती उदासच राहत होती. अखेर तिने गुरुवारी सकाळच्या सुमारास विष प्राशन केले. राजेशने तात्काळ तिला उपचारासाठी खासगी रुग्णालयात भरती केले. मात्र, उपचारादरम्यान तिचा मृत्यू झाला. पोलिसांनी या प्रकरणी अकस्मात मृत्युची नोंद केली आहे.
