मंगळसूत्र चोर अखेर गजाआड ; स्थानिक गुन्हे शाखेची कारवाई
कुही:- मौदा येथून उमरेडला नेऊन देतो म्हणून सांगत कुही तालुक्यातील सोनपुरी शिवारात महिलेच्या गळ्यातील दोन मंगळसूत्र चोरणारा अज्ञात आरोपीचा शोध लावण्यात स्थानिक गुन्हे शाखेला यश आले असून आरोपीला अटक करण्यात आले आहे.
मौदा बसस्थानकावर बसची वाट पाहत बसलेल्या पुष्पा चौधरी नामक महिलेला उमरेडला सोडून देतो म्हणून गाडीवर बसवत कुही तालुक्यातील मुसळगाव-सोनपुरी मार्गावर महिलेच्या गळ्यातील दोन मंगळसूत्र हिसकावून पळणाऱ्या युवकाला स्थानिक गुन्हे शाखेच्या पथकाने अटक केली आहे. नितेश उर्फ लोकेश सुरेश देशमुख (वय-30) रा.सिरसोली, ता.मौदा असे आरोपीचे नाव असून पोलिसांना अवघ्या चार दिवसात आरोपीचा शोध घेण्यात यश आले आहे.पोलिसांनी आरोपीच्या ताब्यातून चोरी केलेले 2 मंगळसूत्र व चोरीसाठी वापरलेली दुचाकी जप्त केली आहे.
या प्रकरणाचा अधिक तपास ठाणेदार भानुदास पिदूरकर यांच्या मार्गदर्शनाखाली पोउपनि स्वप्नील गोपाले, पोह. ओमप्रकाश रेहपाडे, अनिल करडखेडे, राहुल देवीकर करत आहेत.
