हरभरा काढणीवेळी हात अडकून मशीनमध्ये ओढला गेला, तरुणाचा दुर्दैवी मृत्यू
कामठी: तालुक्यातील लिहिगाव येथे हरभरा काढणीच्या कामादरम्यान एका तरुण मजुराचा दुर्दैवी मृत्यू झाला आहे. हरभरा कापणीच्या यंत्रात हात अडकल्याने तो मशीनमध्ये ओढला गेला आणि यात त्याचा जागीच अत्यंत वेदनादायी मृत्यू झाला. साहिल सूरज देशमुख (२५, रा. ब्रम्हपुरी, जि. चंद्रपूर) असे मृत मजुराचे नाव आहे. ही घटना पाहून गावातील प्रत्येकजण हादरला आहे.
लिहिगाव येथील शेतकरी अशोक बालाजी धुडस यांच्या शेतात हरभरा काढणीचे काम सुरू होते. साहिल देशमुख हा मजूर म्हणून हरभरा कापणीच्या मशीनवर काम करत होता. शनिवारी दुपारी तो मशीनमध्ये हरभरा टाकत असताना त्याच्या वडिलांचा फोन आला. फोनवर बोलताना त्याचा हात अचानक मशीनमध्ये अडकला आणि संपूर्ण शरीर आत ओढले गेले. हरभरा यंत्रात अडकल्याने या मजुराचा जागीच मृत्यू झाला. या भयंकर घटनेची माहिती मिळताच मशीन मालक अरविंद सांभारे यांनी तातडीने मदतीसाठी लोकांना बोलावले. गॅस कटर ऑपरेटरच्या सहाय्याने मशीन कापून साहिलला बाहेर काढण्यात आले. त्यानंतर त्याला त्वरित कामठी उपजिल्हा रुग्णालयात नेण्यात आले. मात्र, डॉक्टरांनी तिथे त्याला तपासून मृत घोषित केले.
या दुर्घटनेनंतर साहिलच्या कुटुंबीयांवर शोककळा पसरली असून गावात एकच हळहळ व्यक्त केली जात आहे. नवीन कामठी पोलीस ठाण्यात मृतकाचे सहकारी मनोज बिहारी यांच्या फिर्यादीवरून गुन्हा दाखल करण्यात आला असून पोलीस या घटनेचा अधिक तपास करत आहेत.
