देवळीकला सरपंचांना दिलासा ; अप्पर आयुक्तांच्या आदेशाला ग्रामविकास मंत्र्यांकडून ‘तात्पुरती स्थगिती’
कुही : तालुक्यातील देवळीकला ग्रामपंचायतीचे सरपंच रामेश्वर डोमा खेडेकर यांना राज्य सरकारकडून मोठा दिलासा मिळाला आहे. खेडेकर यांनी दाखल केलेल्या अपीलावर सुनावणी घेताना, महाराष्ट्र राज्याचे ग्रामविकास व पंचायतराज मंत्री जयकुमार गोरे यांनी अप्पर आयुक्त (नागपूर विभाग) यांच्या आदेशाला पुढील सुनावणीपर्यंत तात्पुरती स्थगिती दिली आहे.
अप्पर आयुक्त, नागपूर विभाग यांनी दि.४ नोव्हेंबर २०२५ रोजी सरपंच रामेश्वर खेडेकर यांच्या विरोधात एक आदेश पारित केला होता. या आदेशाच्या विरोधात खेडेकर यांनी महाराष्ट्र ग्रामपंचायत अधिनियमाच्या कलम ३९ (३) नुसार ग्रामविकास मंत्र्यांच्या न्यायालयात अपील दाखल केले होते. या प्रकरणाची पार्श्वभूमी मुंबई उच्च न्यायालयाच्या नागपूर खंडपीठापर्यंतही पोहोचली होती. उच्च न्यायालयाच्या दि.९ जानेवारी २०२६ च्या आदेशानुसार, दि.२७ जानेवारी रोजी व्हिडिओ कॉन्फरन्सिंगद्वारे या प्रकरणाची सविस्तर सुनावणी घेण्यात आली. दि.२७ जानेवारी रोजी झालेल्या सुनावणी दरम्यान अपीलकर्ते सरपंच रामेश्वर खेडेकर आणि प्रतिवादी यांचे वकील उपस्थित होते. क्षेत्रीय स्तरावरील अधिकाऱ्यांनी देखील आपली बाजू मांडली.
दोन्ही बाजूंचे म्हणणे ऐकून घेतल्यानंतर, नामदार मंत्र्यांनी असे मत नोंदवले की, या प्रकरणात दोन्ही बाजूंच्या मुद्द्यांची अधिक सखोल तपासणी करणे आवश्यक आहे. सद्यस्थितीत या प्रकरणाचा अंतिम निर्णय घेणे शक्य नसल्याने, ग्रामविकास मंत्र्यांनी अप्पर आयुक्तांच्या दि.४ नोव्हेंबरच्या मूळ आदेशाला स्थगिती दिली आहे. यामुळे सरपंच रामेश्वर खेडेकर यांना तूर्तास आपल्या पदावर राहण्याचा किंवा कायदेशीर कारवाईतून तात्पुरता दिलासा मिळाला आहे. या प्रकरणाची पुढील सुनावणी लवकरच निश्चित केली जाणार आहे, ज्यामध्ये अंतिम निकाल अपेक्षित आहे.
