विद्यार्थिनीला धर्माच्या आधारावर शाळेत प्रवेश नाकारल्याची घटना नागपुरात उघड ; अल्पसंख्याक आयोगाने तातडीने घेतली दखल
नागपूर : नागपूरच्या जरीपटका परिसरातील दयानंद आर्य कन्या शाळेत एका विद्यार्थिनीला धर्माच्या आधारावर शाळेत प्रवेश नाकारल्याची घटना समोर आली आहे. या प्रकरणी शाळेच्या सचिव आणि दोन शिक्षिकांविरोधात गुन्हा दाखल करण्यात आला आहे. कनिष्ठ महाविद्यालयाच्या मुख्याध्यापिका गीता हरवानी यांनी जरीपटका पोलिस ठाण्यात तक्रार दाखल केली आहे. तक्रारीनुसार, शाळेच्या सचिव राजेश लालवाणी आणि प्रवेश समितीच्या प्रमुख यांनी एका विद्यार्थिनीला केवळ तिच्या धर्माच्या आधारावर प्रवेश नाकारला. या घटनेची माहिती मिळाल्यानंतर राज्य अल्पसंख्याक आयोगाने गंभीर दखल घेतली आहे.
पोलिसांना मिळालेल्या तक्रारीनुसार भारतीय दंड संहितेच्या कलम २९९ (धर्माच्या कारणावरून धार्मिक भावना दुखावणे) अंतर्गत गुन्हा दाखल केला आहे. ही शाळा अनुदानित असून, सरकारी अनुदान प्राप्त करणाऱ्या संस्थेने धर्माच्या आधारावर प्रवेश नाकारणे हे कायद्याच्या विरोधात आहे. या प्रकरणी पोलिसांनी आरोपींना नोटीस बजावण्याची प्रक्रिया सुरू केली आहे. शाळांमध्ये धर्माच्या आधारावर प्रवेश नाकारण्याची ही घटना शैक्षणिक संस्थांमध्ये होणाऱ्या धार्मिक भेदभावाची गंभीर बाब समोर आणते. या घटनेनंतर अल्पसंख्याक आयोगाने या प्रकरणाची सखोल चौकशी करण्याचे आश्वासन दिले आहे. शाळांमध्ये धर्माच्या आधारावर प्रवेश नाकारणे हे कायद्याच्या विरोधात असून, अशा घटनांवर कठोर कारवाई केली जाईल, असे आयोगाने स्पष्ट केले आहे.
