एकतर्फी प्रेमातून युवकाचे १७ वर्षीय विद्यार्थिनीवर भररस्त्यात प्राणघातक हल्ला
नागपूर : एकतर्फी प्रेमातून युवकाने अल्पवयीन विद्यार्थिनीवर हातोडी व कटरने वार करून तिला ठार मारण्याचा प्रयत्न केला. ही थरारक घटना इमामवाडा पोलिस ठाण्याच्या हद्दीतील अशोक चौक परिसरात घडली. या घटनेने परिसरामध्ये खळबळ उडाली असून पालकांमध्ये भीतीचे वातावरण आहे. याप्रकरणी पोलिसांनी गुन्हा दाखल करीत हल्लेखोर युवकाला अटक केली. सूरज कृष्णाप्रसाद शुक्ला (वय २६, रा. इमामवाडा), असे अटकेतील युवकाचे नाव आहे. १७ वर्षीय श्रीजा (नाव बदललेले), असे जखमी विद्यार्थिनीचे नाव आहे.
प्राप्त माहितीनुसार, ती आयटीआयमध्ये शिकते, तर सूरज हा महापालिकेत कंत्राटी कर्मचारी आहे. सूरज हा श्रीजावर एकतर्फी प्रेम करतो. काही दिवसांपासून तो तिचा पाठलाग करायचा. दोन दिवसांपूर्वी श्रीजा ही पायी आयटीआयकडे जात होती. सूरजने तिचा पाठलाग करत इमामवाडा परिसरात तिला अडविले. ‘तू मला खूप आवडते, मी तुझ्यावर प्रेम करतो, असे तो श्रीजाला म्हणाला. श्रीजाने त्याला नकार दिला. ती आयटीआयमध्ये गेली. दुपारी ती घरी परतली. आई-वडिलांना घडलेली घटना सांगितली. श्रीजाचे आई-वडील सूरजच्या घरी गेले. सूरज हा मुलीला त्रास देत असल्याची माहिती त्याच्या पालकांना दिली. पालक व श्रीजाच्या आई-वडिलांनी सूरजची समजूत घातली. ‘पुन्हा असे करणार नाही’, अशी ग्वाही सूरजने दिली.
श्रीजाने आई-वडिलांना माहिती दिल्याने सूरज संतापला. सोमवारी सकाळी श्रीजा पायी आयटीआयमध्ये जात होती. अशोक चौकात सूरजने तिला अडविले. ‘तू माझी होणार नाहीस, तर कोणाचीही नाही होणार’, असे म्हणत सूरजने आधी तिच्या डोक्यावर हातोडीने वार केला. त्यानंतर कटरने तिचा गळा चिरला. श्रीजाने मदतीसाठी आरडाओरड केली. नागरिक धावले. नागरिक पकडून चोप देण्याच्या भीतीने सूरज तेथून पळाला. दरम्यान एका नागरिकाने श्रीजाच्या आई-वडिलांना घटनेची माहिती दिली. ते अशोक चौकात आले. श्रीजाला मेडिकल कॉलेज हॉस्पिटलमध्ये दाखल केले. रात्री श्रीजाच्या आईने इमामवाडा पोलिसांत तक्रार दिली. पोलिसांनी सूरजविरुद्ध प्राणघातक हल्ल्यासह विविध कलमांन्वये गुन्हा दाखल केला.
