चिमुकल्यावर कुत्र्याचा हल्ला, हात, खांदा, मानेचे लचके तोडले
यवतमाळ: वणी येथे भटक्या कुत्र्याने चिमुकल्या मुलावर हल्ला चढवीत त्याला गंभीर जखमी केले आहे. अंगावर काटा आणणारा हा प्रसंग सीसीटीव्हीत कैद झाला असून सोशल मीडियावर मोठ्या प्रमाणात व्हायरल होत आहे. यवतमाळच्या सदाशिवनगरमध्ये ही घटना घडली असून दोन मुले सायकल चालवत असताना कुत्र्याने एका मुलावर झडप घेत त्याला खाली पाडून हल्ला करत चावा घेतला.
वणी शहरातील सदाशिवर नगरमध्ये सायंकाळी 5.40 वाजता दोन मुले सायकल चालवत होती. त्यावेळी तिथे गल्लीत एक मोकाट कुत्रा देखील फिरत होता. 5 ते 6 वर्षांचा मुलगा सायकल खेळत असताना कुत्र्याने थेट त्या मुलावर हल्ला केला. त्यानंतर मुलाने आरडाओरड सुरु केला. पण तेवढ्यात त्या लहान मुलाने कुत्र्याच्या तावडीतून स्वत:ची सुटका केली आणि लगेच तेथून धावत सुटला. मुलाचा आवाज ऐकून तेथे राहत असणाऱ्या काही महिला घराच्या बाहेर आल्या. तर गाडीच्या मागे असणार्‍या महिलेने त्या कुत्र्याला दगड मारला. या संपूर्ण घटनेनंतर या परिसरात लहान मुलांच्या पालकांमध्ये मोठी दहशत निर्माण झाली आहे.
गेल्या अनेक दिवसांपासून राज्यात कुत्र्यांचा हल्ल्याच्या घटना मोठ्या प्रमाणात वाढल्या आहेत. त्यासोबत भटक्या कुत्र्यांची देखील संख्या मोठ्या प्रमाणात वाढली असून भटके कुत्रे रस्त्यावर जाणाऱ्या दुचाकी किंवा चारचाकी वाहनाच्या मागे लागतात. यामुळे चालकाचे लक्ष भटकते आणि अपघात होतात. आता लहान मुलांवर भटक्या कुत्र्यांचे हल्ले हे मोठ्या प्रमाणात वाढले आहेत. त्यामुळे भटक्या कुत्र्यांबाबत प्रशासनाने ठोस पावले उचलावी अशी मागणी आता नागरिकांनी केली आहे.
