व्हाट्सअपवर मुलींचे फोटो पाठवून श्रीमंत ग्राहकांचा शोध ; नागपुरात आई-मुलाचा कारनामा
नागपूर : शहराच्या हुडकेश्वर भागात घडलेली घटना नागपूरकरांसाठी हादरवून सोडणारी ठरली आहे. कारण, अनेकदा अशा रॅकेट्सच्या मागे बाहेरील टोळ्या किंवा संघटित गुन्हेगारी मंडळी असल्याचे आढळत असे. मात्र यावेळी देहव्यापाराचा हा गोरखधंदा आई आणि मुलगा यांनीच एकत्र येऊन रचला होता. आरोपी सुनीता विकास कांबले (वय ४६) आणि तिचा मुलगा यश विकास कांबले (वय २६) अशी आरोपींची नावे आहेत.
त्यांनी हुडकेश्वर येथील संत ताजेश्वर नगरात एक फ्लॅट भाड्याने घेतला होता. बाहेरून ते आरटीओ दलालीचे काम करतात, असं सांगायचे. मात्र, प्रत्यक्षात त्या घरातून मागील सहा महिन्यांपासून देहव्यापार चालवला जात होता. या धक्कादायक कारवाईदरम्यान पोलिसांनी छत्तीसगडमधील २७ वर्षीय एका युवतीची सुटका केली. पैशांचे आमिष दाखवून तिला नागपूरात आणण्यात आलं होतं. तपासात उघड झालं की आरोपी प्रीमियम ग्राहकांनाच लक्ष्य करत होते. व्हाट्सअपवर मुलींचे फोटो पाठवून ग्राहकांशी व्यवहार निश्चित केला जात होता.
पोलिसांनी बनावट ग्राहक पाठवून सौदा ठरवला आणि त्यानंतर छापा मारत आई आणि मुलाला रंगेहात अटक केली. घटनेतील सर्वात संतापजनक बाब म्हणजे आईच स्वतःच्या मुलासोबत अशा घृणास्पद कृत्यात सहभागी झाली होती. पोलिसांनी पीटा कायद्यांतर्गत गुन्हा दाखल करून पुढील तपास सुरू केला आहे.
