रिक्षातून उतरतांना आईसमोरच लेकाला मागून आलेल्या भरधाव ट्रकने चिरडले
नागपूर : हिंगणा नाका परिसरात घडलेल्या एका भीषण अपघातात चिमुकल्याचा दुर्दैवी अंत झाल्याची हृदयद्रावक घटना घडली आहे. आईसमोरच तिच्या सात वर्षांच्या चिमुकल्याचा दुर्दैवी मृत्यू झाला. ट्यूशन क्लासवरुन परतत असताना हा अपघात घडला. ट्रकच्या चाकाखाली सापडल्यामुळे अहान सूरज नायक (वय ७) या मुलाचा जागीच मृत्यू झाला. अपघातानंतर ट्रकचालक पळून गेला, मात्र काही वेळातच त्याला एमआयडीसी पोलिसांनी अटक केली.
मिळालेल्या माहितीनुसार, तुलसी सूरज नायक ही महिला त्यांचा मुलगा अहान (वय ७) आणि मुलगी स्नेहा (वय ९) यांच्यासोबत रामदासपेठ मधील ट्यूशन क्लासहून ऑटोने घरी परतत होत्या. सायंकाळी साधारण चारच्या सुमारास त्या हिंगणा नाका टी-पॉईंटजवळ देशमुख ट्रेडिंग कंपनीसमोर ऑटोतून उतरल्या. त्या ऑटोचालकाला पैसे देत असतानाच अचानक हिंगण्याकडून नागपूरच्या दिशेने जाणाऱ्या ट्रकने (ट्रक क्रमांक एमएच ४०/ सीआर ५१००) अहानला धडक दिली. भरधाव वेगात आलेल्या ट्रकने अहानला धडक देत फरफटत नेलं. अपघातात तुलसी नायक यांच्या पायाला किरकोळ दुखापत झाली.
परिसरातील नागरिकांनी तात्काळ मदत करत लता मंगेशकर रुग्णालयात अहानला दाखल केलं. मात्र, डॉक्टरांनी तपासणीनंतर त्याला मृत घोषित केलं. घटनेची माहिती मिळताच एमआयडीसी पोलीस ठाण्याचे कर्मचारी घटनास्थळी दाखल झाले. नागरिकांनी दिलेल्या वाहन क्रमांकाच्या आधारे ट्रक काही अंतरावर जप्त करण्यात आला आणि चालकाला ताब्यात घेण्यात आले.
