कुही :- कुही पोलीस ठाणे हद्दीत येणाऱ्या मांढळ येथील राजेशाही ढाबा नजीक वळणावर मुख्य मार्गावर भरधाव कारने विरुद्ध दिशेने येणाऱ्या दोन दुचाकींना जबर धडक दिल्याने एक जन गंभीर जखमी झाला तर तिघांना किरकोळ मार दुखापत झाली असून गंभीर जखमीवर नागपूर येथे उपचार सुरु आहे.
कुही ते मांढळ मार्गे येणाऱ्या भरधाव कार क्र. एमएच ४० बीई २२३६ या कारचालकाचे वाहनावरील नियंत्रण सुटल्याने कार विरुद्ध दिशेने जात मांढळ मार्गे कुही जाणार्या दोन दुचाकींना जबर धडक दिली. यात दुचाकी क्र. एमएच ३१ सीसी २७३ या दुचाकीचालक आशिष रमेश लुटे.रा. मांढळ हा गंभीर जखमी झाला तर दुचाकी क्र. एमएच ४९ एवाय ६७८८ वरील आकाश खांडेकर,शुभम गेडाम, दीपिका गेडाम सर्व रा. नागपूर यांना किरकोळ जखम झाली आहे. हा अपघात एवढा जबर होता कि अपघातातील कार चा समोरील भाग व एका दुचाकीचा समोरील भागाचा चेंदामेंदा झाला आहे. जखमींना प्रथम मांढळ येथे उपचाराकरिता नेण्यात आले व तेथून गंभीर जखमी आशिष लुटे याला नागपूर येथे रेफर करण्यात आले. नंतर पंचनामा करीत रस्त्यावरून मोटारसायकल व कार कुही पोलीस स्टेशन येथे रवाना करून पोलिसांनी कार चालकाविरोधात गुन्हा क्र.271/2024 नुसार कलम 279,337,338 भादवी अन्वय्ये गुन्हा नोंद केला.पुढील तपास सुरु आहे.
