देवदर्शन करून परतताना चारचाकी उलटली
युवकाचा घटनास्थळी मृत्यू तर इतर जखमी
कुही:- परिवारासह देवदर्शन करून परत येत असताना रात्री 9.30 च्या दरम्यान कुही वरून माथनी कडे जाणाऱ्या चारचाकी वाहनाचा तालुक्यातील अंबाडी बस स्टॉप जवळ अपघात होऊन यात एका युवकाचा जागीच मृत्यू झाला आहे.तर इतर जखमी झाले आहे.
माथनी(मौदा) येथील नागपुरे परिवार व इतर काही जण एमएच 04 ईएक्स 2047 या चारचाकी वाहनाने श्री.वाघोबा देवस्थान,तपाळ(चंद्रपूर) येथून देवदर्शन करून गावी परत येत असताना कुही तालुक्यातील कुही ते वदोडा मार्गावरील अंबाडी बस स्थानकावर समोरासमोर येणाऱ्या गाडीच्या लाईटचा प्रकाश डोळ्यावर पडल्याने वाहन चालकाचे गाडीवर नियंत्रण सुटून अचानक ब्रेक दाबल्याने चारचाकी उलटली. अपघाताची माहिती मिळताच अंबाडी येथील युवकांची समयसूचकता दाखवून तात्काळ जखमींना कुही येथील ग्रामीण रुग्णालयात दाखल केले.
यात भूषण भगवान नागपुरे (वय 24) रा.माथनी या युवकाला डोक्याला जबर मार लागल्याने डॉक्टरांनी त्याला तपासून मृत घोषित केले. तर इतर जण किरकोळ जखमी असल्याने जखमींना तात्काळ नागपूर येथे रेफर करण्यात आले आहे.
