जबरदस्तीनं पैशांची मागणी करणाऱ्या गुंडाची संतप्त तरुणानं मित्रासोंबत मिळून केली हत्त्या
नागपूर : सदर पोलीस ठाणे हद्दीत एका कुख्यात गुंडाची चाकू व दगडाने निर्घृण हत्या करण्यात आली. ही घटना ताजुद्दीन बाबा दरगाहजवळ, खदान वस्ती, गोंडवाना चौक परिसरात घडली. या हत्येमुळे परिसरात प्रचंड खळबळ उडाली आहे. पोलिसांनी तात्काळ कारवाई करत तीन आरोपींना अटक केली असून इतर आरोपींचा शोध सुरू आहे. मृत व्यक्तीची ओळख अजय मुरलीधर गाते (राहिवासी बैरामजी टाऊन, आदिवासी नगर) अशी आहे.
अजय हा पूर्वीपासून गुन्हेगारी पार्श्वभूमी असलेला असून, त्याच्यावर जरिपटका पोलीस ठाण्यात दुहेरी हत्येचा गुन्हा दाखल होता. याशिवाय, तो दारू आणि एमडी ड्रग्जच्या तस्करीच्या धंद्यातही सक्रिय होता. 2023 मध्ये तुरुंगातून बाहेर आल्यानंतर त्याने पुन्हा बेकायदेशीर धंद्यांना सुरुवात केली होती. परिसरात दहशत निर्माण करून तो लोकांना त्रास देत होता. रात्री अजय हा गोंडवाना चौकाजवळील गल्लीमध्ये बसलेला होता. त्याच वेळी अनुज कनोजिया आपल्या मित्रांसह त्या मार्गावरून जात होता. अजयने त्यांच्याकडे जबरदस्तीने पैशांची मागणी केली. यामुळे संतप्त झालेल्या अनुजने आपल्या साथीदारांसह अजयवर हल्ला चढवला. अनुज कनोजिया, अखिलेश ज्ञानेश्वर कंगाली, मुकेश उर्फ अमन चैतू उईके तसेच करण यादव, अमन यादव, ऋतिक पिल्लै आणि शिवम गेडाम या आरोपींनी मिळून अजयवर दगड, विटा आणि धारदार शस्त्रांनी सपासप वार केले. या हल्ल्यात अजयचा जागीच मृत्यू झाला.
घटनेची माहिती मिळताच मृतकाचा भाऊ अमित मुरलीधर गाते याने सदर पोलीस ठाण्यात तक्रार दिली. पोलिसांनी तातडीने कारवाई करत आरोपी अनुज कनोजिया, अखिलेश ज्ञानेश्वर कंगाली आणि मुकेश उर्फ अमन चैतू उईके यांना अटक केली आहे. उर्वरित आरोपी करण यादव, अमन यादव, ऋतिक पिल्लै आणि शिवम गेडाम हे फरार असून त्यांचा शोध सुरू असल्याचे पोलिसांनी सांगितले. या घटनेने परिसरात भीतीचे वातावरण निर्माण झाले असून पोलीस अधिक तपास करत आहेत. अजय गातेच्या दहशतीला कंटाळूनच आरोपींनी ही हत्या केल्याची चर्चा परिसरात आहे.
