महिलेने कडेवरील मुलासह घेतली तलावात उडी; देवदुतासमान तरुणांनी वाचविले प्राण
नागपूर : एका महिला आपल्या चार वर्षीय मुलाला कडेवर घेऊन फुटाळा तलावावर आली. ती तलावाच्या काठावर बसून विचार करीत होती तर तिचा मुलगा शेजारी खेळत होता. तासभर झाल्यानंतर ती महिला घाईघाईने तलावाच्या पायरीवरुन उठली. तिने मुलाला कडेवर घेतले. लगेच तलावाच्या दिशेने धाव घेऊन अचानक पाण्यात उडी घेतली. किर्ती (३०, रा. टेकानाका) आणि कियांश (४) अशी मायलेकांची नावे आहेत.
पोलिसांनी दिलेल्या माहितीनुसार, टेका नाका येथे राहणाऱ्या मनोज हे एका धार्मिक स्थळावर काम करतात. ते पत्नी किर्ती आणि मुलगा कियांश याच्यासोबत किरायाने राहतात. गेल्या काही दिवसांपासून किर्ती या तणावात वावरत होत्या. किर्ती या मुलगा कियांशला घेऊन टेका नाका येथून सिताबर्डीला आल्या. तेथून त्या फुटाळा तलावावर गेल्या. त्यांच्या मनात आत्महत्येचे विचार घोळत होते. जवळपास तासभर फुटाळा तलावाच्या काठावर बसल्यानंतर किर्ती यांनी मुलाला कडेवर घेतले. त्यानंतर थेट तलावात उडी घेतली.
काही युवक तलावाच्या काठावर बसलेले होते. गप्पा करीत असतानाच किर्ती यांनी अचानक तलावात उडी घेतली. त्याकडे त्या युवकांचे लक्ष गेले. त्या युवकांनी लगेच पाण्यात उड्या घेतल्या. दोघेही मायलेकांना पाण्यातून बाहेर काढून जीवदान दिले. मायलेकाला नागरिकांनी मेडिकल रुग्णालयात दाखल केले. मुलाच्या छातीत पाणी घुसल्यामुळे तो बेशुद्ध पडला होता. त्याची प्रकृती सध्या नाजूक असल्याची माहिती आहे. या प्रकरणाची नोंद अंबाझरी पोलिसांनी केली असून पुढील तपास सुरु आहे.
