सामाजिक सलोखा जपत नागपुरातील प्रसिद्ध श्रीराम शोभायात्रेचे चार ठिकाणी मुस्लिम बांधवांकडून स्वागत
नागपूर : नागपुरातील प्राचिन पोद्दारेश्वर राम मंदिरतर्फे श्रीराम नवमीनिमित्य श्रीराम जन्मोत्सव शोभायात्रा ६ एप्रिलला दुपारी ४ वाजता मंदिरातून निघणार आहे. श्रीराम जन्मोत्सव शोभायात्राचे यंदा ५८ वे वर्ष आहे. शोभायात्रेचे मोमीनपुरासह चार ठिकाणी मुस्लिम बांधवांकडून स्वागत केले जाईल. या शोभायात्रेत सर्व धर्मिय सहभागी होतात, अशी माहिती शोभायात्रा आयोजन समितीतर्फे दिली गेली.
रामनवमीनिमित्य निघणाऱ्या शोभायात्रेत प्रत्येक वर्षी मुस्लीम समुदायातील अनेक लोक सहभागी होतात. यंदाही शोभायात्रेचे मोमीनपुरा, नालसाहब चौकसह इतर दोन ठिकाणी अशा एकूण चार ठिकाणी मुस्लिम बांधवांकडून शोभायात्रेचे स्वागत केले जाणार आहे. मंदिर समितीतर्फे प्रत्येक वर्षी नित्याने ईद वा इतर उर्सच्या रॅलीचे स्वागत केले जाते. पुढेही ही प्रथा कायम राहणार असल्याचेही सांगण्यात आले.
नागपुरात नुकतेच झालेल्या हिंसाचाराचा हिंदु- मुस्लिम बांधवातील सदभावनेवर काहीही परिणाम होणार नाही. मध्य नागपुरातील स्थिती सामान्य आहे. दरम्यान यंदाच्या शोभायात्रेत ९० हून जास्त दर्शनी रथ वा पथके सर्वसामान्यांचे लक्ष वेधून घेणार आहे. त्यात नुकत्याच झालेल्या कुंभ मेळ्याशी संबंधित एक आकर्षक रथ राहणार असल्याचेही यावेळी आयोजकांकडून सांगण्यात आले.
