स्कूलव्हॅनच्या धडकेत सासऱ्याचा मृत्यू ,जावई गंभीर जखमी
कोराडी : भरधाव स्कूलव्हॅन चालकाने रस्त्याने पायी जात असलेल्या दोघांना धडक दिली आणि फरार झाला. यात दोघेही गंभीर जखमी झाले. रुग्णालयात उपचारादरम्यान सासऱ्याचा मृत्यू झाला, तर जावयावर उपचार सुरू आहेत. ही घटना कोराडी ठाण्यांतर्गत बोखारा परिसरात घडली. जयराम असाडू पवार (५५) असे मृताचे नाव आहे. पोलिसांनी जखमी संतोष शंकर राठोड (३५) च्या तक्रारीवरून आरोपी वाहन चालकाविरुद्ध गुन्हा नोंदविला आहे.
पोलिसांकडून मिळालेल्या माहितीनुसार, जयराम जाधव आणि त्यांचा जावई संतोष राठोड हे दोघेही मुळचे छिंदवाडाच्या अमरवाडा येथील रहिवासी आहेत. दोघेही मजुरीचे काम करण्यासाठी नागपुरात आले होते. बोखारा परिसरातील एका बांधकामावर त्यांना काम मिळाले होते आणि तेथेच रहात होते. सायंकाळी ७ वाजताच्या सुमारास दोघेही बोखारा रेल्वे क्रॉसिंगजवळून पायदळ गृहपयोगी सामान खरेदी करण्यासाठी जात होते. हंस बिअर बारजवळ स्कूल व्हॅन क्र. एमएच-३१/ईएम-००८९ च्या चालकाने त्यांना मागून जबर धडक दिली आणि फरार झाला. यात जयराम आणि संतोष हे दोघेही गंभीर जखमी झाले. अपघात होताच मोठी गर्दी जमा झाली.
घटनेची माहिती मिळताच कोराडी पोलीस घटनास्थळी पोहोचले. दोघांनाही जवळच्या रुग्णालयात घेऊन गेले. मात्र प्रकृती चिंताजनक असल्याने त्यांना मेडिकल रुग्णालयात दाखल करण्यात आले. मेडिकलच्या डॉक्टरांनी जयराम यांना मृत घोषित केले. पोलिसांनी संतोषच्या तक्रारीवरून आरोपी चालकाचा शोध सुरू केला आहे.
