वळणावर चालकाचं नियंत्रण सुटलं ; भरधाव गाडी दोन युवतींना धडक देत घराच्या वॉल कम्पाऊंडला धडकली
नागपूर : अंबाझरी पोलिस ठाण्याच्या हद्दीत घडलेल्या एका अपघातात एक भरधाव कार थेट घरात शिरल्याने एकच खळबळ उडाली. ही घटना एका उद्यानाच्या वळणावर घडली. यावेळी परिसरात वॉकिंग करणाऱ्या दोन युवतींशिवाय चालक आणि त्याचा साथीदार असे चौघे जण जखमी झाले. ही घटना सायंकाळी साडेसहा वाजताच्या सुमारास उघडकीस आली. गौरी सावरकर, कीर्ती गोले अशी जखमी तरुणींची नावे आहेत.
सायंकाळी अंबाझरी उद्यानाच्या वळणावरून एमएच ४९-एस-१८०० क्रमांकाची कार भरधाव येत असतांना चालकाचे कारवरील नियंत्रण सुटल्याने ती थेट रस्त्याच्या खाली उतरली. यावेळी तेथून वॉकिंग करीत असलेल्या गौरी सावरकर, कीर्ती गोले यांना धडक देत जखमी केले आणि बाजूला असलेल्या कुमरे यांच्या घराच्या वॉल कम्पाऊंडला कार धडकली. कारची गती इतकी होती की, धडकेत वॉल कम्पाऊंड पूर्णतः पडले. यावेळी चालकासह त्याचा साथीदारही जखमी झाला.
घटनेची माहिती मिळताच पोलीस घटनास्थळी दाखल झाले. त्यापूर्वी चारही जखमी हे खासगी रुग्णालयात दाखल झाले होते. सध्या चौघांवरही उपचार सुरू असून त्यांची प्रकृती स्थिर असल्याची माहिती समोर आली. या प्रकरणी दिलेल्या तक्रारीवरून पोलिसांनी कार चालकाच्या विरोधात गुन्हा दाखल केला असून पुढील तपास सुरू आहे.
