बाबुळखेडा चिचोली शिवारात देशी कट्ट्याने गोळीबार ; एक ठार तर एक गंभीर जखमी
खापरखेडा : गुरुवारी (दि. 2) बाबुळखेडा चिचोली शिवारात देशी कट्टयाने गोळीबार करण्यात आला. या घटनेत एक व्यक्ती ठार तर दुसरा गंभीर जखमी झाला आहे. पवन धीरज हिरणवार (28, रा. काचीपुरा, नागपूर) असे मृताचे तर शैलेश उर्फ बंटी हिरणवार (31) असे जखमीचे नाव आहे.
गुरुवारी दुपारच्या सुमारास पवन हिरणवार, शैलेश उर्फ बंटी हिरणवार आणि इतर तीन साथीदार (एमएच- 47/बीके-0323) क्रमांकाच्या कारने बाबुळखेडा येथील पंचमुखी हनुमान मंदिराच्या दर्शनाला गेले होते. दर्शन घेऊन निघताना आरोपींनी देशी कट्ट्याचा वापर करून त्यांची कार थांबवली. यानंतर रस्त्याच्या कडेला असलेल्या शेतात पळत जात असताना गोळीबार झाला. पवन हिरणवारच्या डोक्यात दोन तर छातीवर एक गोळी लागली. ज्यामुळे त्याचा घटनास्थळावरच मृत्यू झाला. शैलेश उर्फ बंटी हिरणवारला दोन गोळ्या लागल्या असून, तो गंभीर जखमी झाला आहे.

दरम्यान, घटनेची माहिती मिळताच ग्रामीण पोलिस अधीक्षक हर्ष पोद्दार, अप्पर पोलिस अधीक्षक रमेश धुमाळ आणि स्थानिक गुन्हे शाखेचे अधिकारी घटनास्थळी पोहोचले. पोलिसांनी घटनास्थळावरून एक देशी कट्टा आणि एक चाकू जप्त केला आहे. घटनास्थळी पंचनामा करून मृतदेह शवविच्छेदनासाठी शासकीय मेयो रुग्णालयात हलविण्यात आले.
- दुचाकीने आले आरोपी
पवन आणि त्याचे साथीदार पंचमुखी हनुमान मंदिरात दर्शनासाठी जाणार असल्याची माहिती आरोपींना होती. आरोपी दुचाकीने घटनास्थळी आले होते. काही पोलिसांच्या मते, आरोपींना कुणीतरी माहिती दिली असावी. घटनास्थळी दोनपेक्षा जास्त आरोपी असण्याची शक्यता वर्तवली जात आहे.



