उमरेड-कऱ्हांडला अभयारंण्यात “एफ-२” वाघिणीचा पाच बछड्यांसह मुक्त वावर
नागपूर : गेल्या काही महिन्यांपासून उमरेड-कऱ्हांडला अभयारंण्याकडे पर्यटकांचा ओढा वाढत आहे आणि त्यासाठी कारणीभूत ठरत आहे ती “एफ-२” वाघीण आणि तिचे पाच बछडे. याच वाघीण आणि तिच्या बछड्यानी अभयारंण्यातील गाईड आणि जिप्सी ड्रायव्हर यांना अडचणीत आणले होते. त्यामुळे अजूनच त्यांना बघण्याची चुरस पर्यटकांमध्ये वाढीला लागली आहे. यातून “सेलिब्रिटी” तर सुटले नाहीतच, पण सरकारी अधिकाऱ्यांना देखील हा कुटुंबकबिला पाहण्याचा मोह आवरत नाही आहे.
उमरेड-कऱ्हांडला अभयारंण्याला खरी ओळख मिळवून दिली ती ‘जय’ या वाघाने. नागझिरा अभयारंण्यातून नैसर्गिक स्थलांतर करुन आलेला हा वाघ नंतर कधी उमरेड-कऱ्हांडला अभयारंण्याचा झाला ते कळलेच नाही. कधी राष्ट्रीय महामार्गावर, कधी नद्या ओलांडणाऱ्या ‘जय’ ला पाहण्यासाठी सामान्य पर्यटकांपासून तर ‘सेलिब्रिटी’ अशी सर्वांचीच गर्दी असायची. मात्र, ‘जय’ गेला आणि पर्यटकांनी या अभयारंण्याकडे पाठ फिरवली. त्यानंतर ‘फेअरी’ ही वाघीण आणि तिच्या पाच बछड्यांनी पर्यटकांना आकर्षित केले. त्यानंतर पुन्हा पर्यटकांना तिला बघण्याची ओढ लागली. उमरेड कऱ्हांडला अभयारंण्यातील गोठणगाव गेट जवळ “एफ-२” नावाच्या या वाघिणीसह तिच्या पाच बछड्यांचे पर्यटकांना दर्शन होत असल्याने पर्यटक सुखावले आहेत.
“एफ-२” वाघीण ही “फेअरी” वाघिणीची मुलगी आहे. “एन-४” आणि “पाटील” नावाच्या दोन वाघासोबत तिचा वावर होता. वाघीण आणि तिच्या बछड्यांना पाहण्यासाठी पर्यटकांमध्ये चुरस लागल्याने अक्षरशः त्या संपूर्ण कुटुंबाची वाट अडवण्याचा प्रकार दरम्यानच्या काळात झाला होता. ज्यामुळे पर्यटक मार्गदर्शक, वाहनचालकच नव्हे तर पर्यटकसुद्धा अडचणीत आले होते. वाहनचालक आणि पर्यटक मार्गदर्शक यांचे काही कालावधीसाठी निलंबन तर पर्यटकांना अभयारंण्यात बंदी घालण्यात आली होती.
